對於由細到大都講廣東話嘅香港人，有無發現我哋好多時講嘅嘢都「有音無字」咖呢？就係因為呢個緣故，我哋平時用Whatsapp、微博、Facebook嗰陣，都會假借同音字嚟取替一啲所謂「有音無字」嘅字去表達自己嘅意思 (好似我哋個專頁咁!)。而當個個都咁寫嘅時候，大家亦都唔會再去慢慢深究「啱」同「錯」，就算明知係錯，我哋都會繼續「錯落去」，因為咁樣反而仲能夠將意思表達得更加傳神，更加貼切。其實廣東話並非「有音無字」，只不過係我哋唔識寫咁解咖喳！喺《山旮旯》呢個環節，我哋會陸續介紹一啲得意嘅中文字。當中有啲係「你未見過，但係日日都講」嘅字、亦都會有「你見過，但係未用過」嘅字、又或者「你又未見過，又未用過」嘅字。雖然你睇咗都唔會用，不過睇吓無妨吖！