哈！呢隻歌聽咗幾十年，係唔係家陣先發現你唔識得寫呢個字呢？「糴」字部首為「米」部，讀作「笛」，同「籴」字相通，解作「買米」嘅意思，所以我哋成日聽到啲人話「糴米」，原來即係「買米」，而且仲真有其字咖喎！咁《半斤八両》歌詞裡面嘅「通街走糴」又係咩意思呀？其實即係「到處奔波」咁解。所以我哋廣東人有時都會用「走走糴糴」呢句說話嚟到表達自己「出去做嘢做到好辛苦！」咖！

唔知大家留唔留意到，其實個「糴」字嘅結構非常有趣咖喎！細心留意一下「糴」字嘅左手邊，你會發現係由「入」字同「米」字組成嘅，所以淨係睇個字，大家都應該大概會估到呢個字嘅意思！咁有無一個字解作「賣米」咖？講埋俾你聽啦，「糶」字 (留意呢個字左手邊係由「出」同「米」組成咖！) 就係解作「賣米」嘞! 「糶」讀作「跳」，有時我哋睇戲嗰陣聽到啲毒販話「跳灰」，其實應該寫作「糶灰」，意指「賣白粉」咁解！不過呢個詞語始終比較俗，大家當學識多個中文字就算喇，千祁唔好亂用呀！