第六集 – 瀡滑梯

見到大台嘅金草演員Benz雄,就好自然諗起當年佢喺《新紮師妹》度教大家寫「方中Sir」個「Sir」字。佢隨手將「S」、「I」、「R」三個英文字放喺上面,下面加個「木」字,然後右手面再加個「阝」,就造咗個「Sir」字出嚟,成為一時佳話。咁究竟有無中文字係讀「Sir」音咖呢?其實係有咖! 不過意思就一定唔係解「阿Sir」嘞!講咗咁耐,咁到底點寫咖呢?

 

嗱,「瀡」可讀作「Sir」,亦可以讀作「緒」,係一個古字嚟嘅,意思係「滑」咁解。「瀡」可以當動詞用,譬如小朋友去公園玩滑梯,其實係應該寫作「瀡滑梯」;「瀡」亦可以當做擬聲詞咁用,例如日本人食麵食到有聲,原來係應該寫作「瀡瀡聲」咖喎!另外,其實以前亦都聽人講過,話如果要形容一個人「烏龍、大懵、烏Sir Sir」,亦都應該寫做「烏瀡瀡」。不過呢一個例子我哋就唔太敢肯定嘞,如果大家知道,留個言喺呢度分享吓呀!